Après l’ravèyons !

Bon èyèt adon lès cousses, comint c’qui ca a stî l’ravèyons ?
Bén dj’è nné l’doutance, vos avèz fé bombance ; bén mindjî, bén bu, bén fé l’fièsse.
Bon asteûre, tant pîre qui vos èstèz nauji, i faut tout rimète à s’place èyèt fé l’bagâdje.
Alèz lès omes, dji l’sé bén qui ci n’èst nén plaîjant, mins ni fèyèz nén in mwés visâdje èt ni fèyèz nén chènance d’awè mau vos boudènes ou bén vos tièsses, alèz boutèz in côp mwin à vos coumères èyèt sins bèz’né pasqui t’taleûr i va putète awè dès djins qui vont v’nî à vo maujo vos souwétî in djwèyeûx Nowé èyèt i faut qui tout fuche bén prope !
C’èst Madame qui l’a dit !
Bon oyi, dji l’sés bén, di timps à ôte lèyes ètou font chènances d’awè mau leûs tièsses èt, souvînt, nén au bon momint mins c’èst Nowé fèyèz in èfort.
Eyèt mi vos m’dîrèz !
Qwè mi !
Dji seûs è trin d’vos scrîre èt dji n’sés fé deûs afères au côp … nén vré !
Mi feume, c’èst seûr, èle sé bén l’fé, lèye, deûs afères au côp ; fé l’bagâdje èyèt grignî après mi.
Oyi m’chèrîye dj’arive ! Alèz lès cousses, si dji n’vout nén awè l’bisbrouye dins m’win.nâdje èt si dji vou awèz ène ôte afère qu’ène tâye di pwin sètche pou mi din.ner i m’faut vos lèyi, i gn-a l’drap d’mwin qui m’ratind.
Mins d’vant d’en’n’aller fé mi d’vwâr, nos vos souwaîtons mi feume èyèt mi, in bon, eûreûs èt clapant Nowé.

Pol Soumillon